سمح العلم
كلمات الشاعر: هيثم عباس
غناء الفنانة: حرم النور
يا يمة لو ما صار ارادة
سمح العلم سمح الشهادة
يا حليلو نحنا قطرنا فات
زمانا كان والدك يعاكس
لا تقري لا تدخلي المدارس
ما قلنا بنحيا قدر ده كلو
ونشوف بنات جيل واعي دارس
يا حليلو نحنا قطرنا فات
الواحدة من سن أربعتاشر
يدوها لي الفي تجارتو شاطر
أبوك يديهو من غير يشاورك
من غير تشوفي تقولي حاضر
يا حليلو نحنا قطرنا فات
احمدن انتن الله سيدكن
تابن الداروهو غيركن
تختارن الشئ الفي مرادكن
وتقررن انتن مصيركن
يا حليلو نحنا قطرنا فات
قريتن الجامعة ورطنتن
إنجليزي لُبك معجن
نصو عربي وشيتاً تاني
بتفهمنوا براكن انتن
يا حليلو نحنا قطرنا فات
والله لينا الما قرينا
يا الأنترنت سويتا فينا
اريتا كان جيت في زمنا
كان للوصايل ملينا
يا حليلو نحنا قطرنا فات
نقول قسمتنا كدا نسميها
أنا حبوبة قريب للمية
لا ببقى دكتور لا وزيرة
ينفعني محو الأمية
يا حليلو نحنا قطرنا فات
يا يمة لو ما صار ارادة
سمح العلم سمح الشهادة
يا حليلو نحنا قطرنا فات
#للانضمام لمجموعة قروبات أجمل الأمثال والاغاني السودانية 0912360227 واتس
