#فيما_يخص
موضوع المطربة/ عائشة محمد صالح (عاشة الجبل)
في نقطة معينه لازم أوضحها بالرغم من إنه الموضوع بالنسبة لي وليكم ماذات أهمية لكن لما لقيت الناس بتتكلم بي صورة في فهم قانوني غلط؟ … كان لازم أكتب التوضيح ده
#أول_حاجة
نحن في القانون ما بنحدد ونقول الزول ده غلطان أو صاح إلا لما المحكمة تفصل وتصدر حكم نهائي، لأنه في الأصل (المتهم بريء حتى تثبت إدانته) ده مبدأ ثابت ومعروف وموجود في كل القوانين وبيضمن للناس حقوقهم وما يخلي المجتمع يحكم عليهم ساي بدون بيّنة وأدلة ومحاكمة
#تاني_حاجة
القضية دي ما زالت (إن وجدت لأني مامتابع الحاصل فيها شنو) في مرحلة البلاغ والتحري، ولسة ما اتقدمت للمحكمة عشان تصدر حكم نهائي، فبالتالي أي زول يجي يطلق حكم مسبق على طرف ويقول ده غلطان وده مظلوم، بكون سبق العدالة وظلم التاني ساكت عشان كده الأفضل نناقش الموضوع من الجانب القانوني العام بدون ما ندخل في تفاصيل شخصية أو نصدر أحكام
#تالت_حاجة
الناس في السوشيال ميديا لمن إتكلموا في القضية دي ماعارفين الفرق القانوني بين الجرائم المتعلقة بالكلام، ودة الشئ الخلاني اتكلم واوضح ليهم عسي ولعل المنشور يوصلهم … تعالو نشوف الفرق
#الإساءة_والسباب
لما زول يشتم زول بكلمة جارحة وشينة لكن غير ممكن تنطبق على البني آدم زي (يا كلب، يا حمار يا حيوان) دي بتعتبر إساءة وسباب … ليه؟ لانه فيها تحقير للإنسان والحط من كرامته وإهانته ودي في المادة (160) وعقوبتها السجن مدة لاتجاوز شهر أو الغرامة
#إشانة_السمعة
لما زول يصف شخص بوصف بيسيء لي سمعته الاجتماعية أو المهنية أو يخلي الناس تنظر ليهو نظرة دونية، زي (يا حرامي، يا نصاب، يا بتاع البنقو) او يوصف سلوكه الأخلاقي دي جريمة إشانة سمعة …ليه؟ لأنه الوصف هنا ممكن يتحقق وينبطق على الإنسان لكن مامفروض نقوله للناس إلا لما يثبت عليهم وفي حدود ضيقة حانعرفها لي قدام داخل المنشور ودي في المادة (159) وعقوبتها السجن (6) شهور أو الغرامة أو بالعقوبتين معاً
#القذف
لما يكون الكلام موجه للشرف أو العرض تحديداً زي الألفاظ البذيئة أو الاتهام في العفة (يا لو ….ي، يا شر …طة) دي بتسمى جريمة قذف وهي أخطر من الإشانة ودي في المادة (157) وعقوبتها الجلد (80) جلدة
#بالنسبة_للموضوع_الحاصل_ده
أقرب وصف قانوني ليهو من الناحية النظرية ممكن يكون #إشانة_سمعة لكن برضو في النهاية، التقدير؟ عند النيابة، وهي البتقرر المادة الأنسب للاتهام حسب الوقائع والأدلة
#القانون_الجنائي1991م
نص في المادة (159) على جريمة إشانة السمعة واداها تعريف زي ما وضحنها فوق، ولكن قال في حالات مستثنية من إشانة السمعة يعني الفعل مابكون جريمة … طيب الحالات دي شنو؟
#الإجراءات_القضائية
القانون سمح لأي زول يتكلم أو يكتب داخل المحكمة أو في ملفات الدعوى بقدر ما يقتضي الموضوع عن سمعة الزول، مثلاً : محامي يقول للمتهم في المحكمة إنت متهم بسرقة كذا .. هل إنت شوفت الحاجة دي؟
هنا ده ما بيتحسب إشانة سمعة لأنه في إطار قضية
#الشكوى_أو_المصلحة_المشروعة
لو إنت عندك مظلمة حقيقية أو عايز تحمي حقك أو حق غيرك، عندك الحق تقدم شكوى أو توضح المشكلة حتى لو الكلام فيه مساس بسمعة زول، مثلاً: زول خدعك في قروش؟ إنت ممكن تمشي النيابة وتقول فلان نصب علي .. هنا ده ما إشانة لأنها شكوى مشروعة، لكن لو طلع مافي دليل وإتهمت الزول ساي؟ هنا الجريمة بتكون إتهام كاذب المادة (114) ما إشانة سمعة المادة (159) لأنك بديت ضده إجراءات قانونية
#الوظائف_العامة
أي زول بيترشح لمنصب عام أو بيشغل وظيفة عامة بيكون معرض للنقد والتقييم لأنه المنصب ده متعلق بالناس كلهم، مثالاً: لو زول مترشح للبرلمان، ممكن الناس تقول فلان ما كفء لأنه عندو سوابق في الفساد او أخلاقه ما أخلاق زول يمسك منصب زي دة … هنا برضو ده ما يعتبر جريمة
#النصيحة
القانون سمح تقول رأيك لو كان في سياق نصيحة لزول تاني أو للمصلحة العامة، مثلاً: صديقك عايز يشارك زول في تجارة، وإنت عارف الزول ده ما أمين، من حقك تقول ليهو (خلي بالك الزول ده عندو مشاكل في التجارة دي ممكن يغدر بيك … فده نصح ما إشانة
#الشهرة_بالصفة
لو في زول إشتهر بحاجة وغلبت عليه، أو هو ذاته بمارسها علناً؟ القانون ما بيعتبر الكلام عن الموضوع ده إشانة سمعة، لو كان الكلام بحسن نية مثلاً : فنان مشهور بالغناء، ويتصور مع البنات العاريات أو مذيع معروف بالجدال الحاد والمشاكل مع صيوفه أو زول بيجاهر بتجارته في الخمر أو تعاطيهو للبنقو أو مشهور إنه بنبذ الناس …هنا لما الناس يذكروهو بالحاجة دي؟ ما بتكون جريمة
#التقييم_العام
أي زول عرض نفسه أو عمله للناس عشان يقيموه، زي فنان نزل أغنية أو سياسي طلع خطاب، طبيعي الناس يقولوا الغنية دي ضعيفة أو الخطاب السياسي ده فاشل … فده نقد مباح في حدود التقييم الموضوعي، #مثلاً ممكن تقول عن لاعب كورة الآداء بتاعو ضعيف ومابعرف يلعب ودة ما بشيل الفريق؟ دي ما تعتبر إشانة
…
ودة كل مافي الموضوع البخص جريمة إشانة السمعة
المستشار القانوني محمد آدم فُنجال
